लिस्बन – युरोपेली परिषदअन्तर्गत रहेको घृणा, जातीय भेदभाव तथा असहिष्णुताविरुद्धको आयोग (ECRI) ले पोर्तुगलमा आप्रवासी, जातीय तथा यौनिक अल्पसंख्यकमाथि बढ्दो घृणा अपराध र अभिव्यक्तिलाई लिएर गम्भीर चिन्ता व्यक्त गरेको छ। आयोगले बुधबार सार्वजनिक गरेको विशेष प्रतिवेदनमार्फत पोर्तुगल सरकारलाई घृणा अपराध नियन्त्रणमा अझ कडा र प्रभावकारी रणनीति अवलम्बन गर्न आग्रह गरेको हो।

स्ट्रासबर्गस्थित ४६ सदस्य राष्ट्रहरूको यस आयोगले पोर्तुगलमा पछिल्लो समय आप्रवासी, रोम समुदाय (Roma), LGBTQI+ तथा कालो वर्ण भएका मानिसहरूविरुद्ध हुने अभिव्यक्ति र हिंसात्मक गतिविधिहरूमा उल्लेखनीय वृद्धि भएको चेतावनी दिएको छ।

प्रतिवेदन अनुसार, केही घटनामा नव-नाजी समूहहरूको संलग्नता रहेको शंका गरिएको छ। सुरक्षा निकायहरूले यस्ता घटनालाई गम्भीरतापूर्वक नलिएको भन्दै आयोगले सुरक्षा बलहरूलाई घृणा अपराधबारे थप तालिम र जवाफदेही बनाउन सुझाव दिएको छ।

चरम दक्षिणपन्थीको उदय र आतङ्क योजनाको खुलासा

यो रिपोर्ट सार्वजनिक हुनुको पूर्वसन्ध्यामा पोर्तुगलको न्याय प्रहरी (Judicial Police) ले एक चरम दक्षिणपन्थी समूहसँग सम्बन्धित ६ व्यक्तिलाई आतंकवादी गतिविधि, भेदभाव र हिंसा उक्साएको आरोपमा पक्राउ गरेको थियो। पोर्तुगाली सञ्चारमाध्यमहरूका अनुसार पक्राउ परेकामध्ये एक जना प्रहरी अधिकारी समेत रहेका छन्, र उनीहरूले संसद भवनमा आक्रमण गर्ने योजना बनाइरहेका थिए।

मार्चमा सम्पन्न संसदीय निर्वाचनपछि Chega पार्टी देशको प्रमुख विपक्षी शक्तिका रूपमा स्थापित भइसकेको छ। चरम दक्षिणपन्थी दलहरूको बिस्तारसँगै अल्पसंख्यक समुदायहरूमा थप त्रास र असुरक्षा महसुस भइरहेको जनाइएको छ।

आयोगको सिफारिसहरू

ECRI ले पोर्तुगल सरकारलाई तलका कदमहरू लिन आग्रह गरेको छ:

• सुरक्षा निकायलाई घृणा अपराध सम्बोधन गर्न विशेष तालिम दिनु

• अल्पसंख्यकमाथि हुने जातीय र यौनिक हिंसा तथा अभिव्यक्तिबाट पीडितलाई न्याय सुनिश्चित गर्नु

• नव-नाजी वा अतिवादी समूहहरूको निगरानी र नियन्त्रणमा कडाइ गर्नु